Ang Kahayag sa Panimalay – Gula 2

Nagpadayon ang huot ug hinay nga dagan sa trapiko sa kadalanan hinungdan nga si Aryana nakapadayon usab sa pagpamalandong ug emote sulod sa sakyanan. Sukad sa iyang pagkabatan-on dali ra gyud kaayo siya pahilakon. Mao ni ehemplo sa giingon sa mga katigulangan nga kapayason nga tawo. Tingale tungod kay sama sa kapayas nga tuslokon lang gani og gamay modagayday naman dayon ang tulo sa tagog sama ug luha sa mga mata ni Aryana nga bisan unsaon niyag pugong padayon ug tulo sa iyang nawong.

Naglibong siya kon asa man gyud siya dapita nalain sa nahitabo ganihang buntag tali kaniya ug sa iyang kamaguwangan nga si Andrew. Sa gisulti ba nga mga pulong ni Andrew o may lain pa bang hinungdan? Kon sa mga pulong lang ni Andrew, para kang Aryana dili man pud bastos ug tunada pagkasilti niya. Kalma ra man si Andrew miingon og “Mama, kapoy na sigeg paminaw nimo. Usahay dili na mi ganahan molihok nalang kay sige kag kasuko namo.” Gani sigon sa memorya ni Aryana mura pa man og pamarayeg ang tono sa pagsulti ni Andrew kaniya.

“Nganong nasakitan man gyud ko uy? Unsa man gyuy hinungdan ani?” paminsar ni Aryana sa kaugalingon.

“Bzzz…bzzz…” mitingog ang iyag selpon. Nakita niya nga si Nicole ang nanawag. “Unsa na sad kahay tuyo ani ay. Basig manghagad na sad ni og pickleball,” hunahuna niya.

Gitubag ni Aryana ang selpon, “Hi Nicole. Unsa man?”

“Ah! Ka suplada uy,” tubag ni Nicole. “Hain man ka karon?”

“Naa pa intawn taliwa sa dalan kay perteng trapika,” tubag ni Aryana samtang gahinayhinay og pahid sa iyang mga luha.”
“Taympa. Okey ra ka? Mura man kag naghilak,” mabalak-on nga pangutana sa iyang amiga.

Si Nicole suod nga higala ni Aryana. Mga estudyante pa sila gakuyog na sila sa daghang mga panaw sa kinabuhi. Ug karon nga aduna na silay tagsatagsa ka pamilya, padayon sila sa ilang pagka-amiga bisan gani sa ilang mga napalgan nga bag-ong kahiligan sama sa klase klase nga aktibidades sa paugnat sa kusog.

Sayod si Nicole, ug inong man si Aryana ngadto kang Nicole, sa mga hagit ug kalisdanan nga ilang naagian sa kinabuhi kay magpaambitay man gyud sila sa usag-usa. Mao tingale nga bisan og sa selpon lang, si Nicole nakaalinggat dayon nga si Aryana naghilak. Anaa na antas sa panaghigala silang duha nga bisan walay pulong isulti magkasinabot dayon sila.

“Ha?! Unsay naghilak? Wa man gud,” tubag ni Aryana.

“Ay na lag pamakak diha, ‘day, kay bisag manikma pa ka makahibaw ko og naunsa ka. Ngano man ka?”

Misamot hinuon pagtagak ang luha ni Aryana karon nga anaa sa Nicole sa pikas linya. Ambot ba, naglibog sab siya kay kon anaa na gani laing tawo, labi na si Nicole nga iyang suod nga higala, mosamot na man hinuon siyag ka-emosyonal. Naulian na unta siyag gamay ganiha, karon nisamot pa kay nagbagko na gyud hinuon siya.

“Inday Nicole…si Andrew na usab na…” yangongo ni Aryana ngadto kang Nicole. [SUMPAYAN]