Ang Kahayag sa Panimalay – Gula 6

Nakuyawan si Andrew sa kalit nga pagsingka kaniya ni Aryana ug nakaatras siya sa kahadlok. Si Arlyn ra man unta kadto ang gikalagotan sa iyang inahan kay wala man dayon buhata ang iyang gisugo nga pagpasulod sa mga kinompra didto sa refrigerator, ilabi na kadtong mga butang nga dali madaut kon dili dayon masulod.

Human mahapak ni Aryana ug kusog si Arlyn ug human misulay og pugong si Andrew, nati-on ni Aryana ang iyang kasuko ngadto kang Andrew dungan ang paghinumdum sa iyang kalagot nga gisultihan siya ni Andrew nga gikapoyan na siyag paminaw sa punay nga pagyawyaw ni Aryana sa panimalay. Apan sa pagkatinuod, mao man gyud ang hinungdan nganong init kaayo og ulo si Aryana hangtod nga wa na siya makaantos diha sa gamay nga sayop ni Arlyn kaganiha.

“Kuyawa ninyo noh!” padayon nga pagyawyaw ni Aryana. “Hayahay pa kaayo mo og kinabuhi unya mahitabo pa ning ingon ini. Sus! Kung nasayod pa lang mo kon unsa ka lisod among kinabuhi sa una samtang nagtubo mi tingaleg dili mo mag-ingon ani. Nasayop ba ko nga gipaningkamotan namo sa inyong amahan nga mahayahay inyong kahimtang?”

Naghinoktok si Andrew samtang nagpadayon pagbakho si Arlyn sa daplin sa sofa, nagtikongkong ug naghinayhinay og hapohap sa iyang paa nga ninglabhag na tungod sa makusog nga paghampak ni Aryana.

“Na hala! Kon mao man lang diay na inyong himoon, mas maayo pag patagamon mo og kalisod. Aron makat-on mo kon unsa gyud ang kinabuhi. Kay padayonon mo ingon ani, magsige man lang mo og tutok anang inyong mga gadgets, kanang inyong selpon, kompyuter, tv ug unsa pa nang gikahiligan ninyo diha sa internet nga hapit nalang mapilit ang inyong mga kalimutaw sa sigeg tan-aw.”

Milakaw si Aryana og gikolekta ang mga selpon ug tab nila ni Andrew ug Arlyn ug gibutang nga pinabundak sa lamesa, maayo lang gani kay wala ra pud mangaguba. “Sukad karon, ug makakita ko ninyong duha nga mogamit aning mga butanga nga dili konektado sa inyong pag-eskwela, bisag pila ka segundos pa, pagdahom nalang mo og silot. Ha? Nagkasinabot ta, Andrew ug Arlyn?”

Wala misanong ang duha. “Nakasabot ba mo?!” misingka si Aryana kanila.

“Oo, ma,” naigking nga tubag sa duha.

“Dili ko mosulti ninyo kon unsay silot nagpaabot kay mga maro kaayo mo mga bataa mo. Ako ray inyong bantayan. Pero hinuon tungod sa epekto aning mga gadgets dili naman gani mo kabantay mao ni nahitabo karon. Hala sige! Padayona na ninyo!”

Gibiyaan ni Aryana ang duha ug bundak og tunob nga misaka sa taas. Pagsulod sa iyang lawak, madungog ang pagbundak sa pultahan nga misirado. [SUMPAYAN]