Dangoyngoy

Lima na katuig si Loloy isip panday sa usa ka contractor sa syudad sa Lapu-lapu. Sa dihang nagkita sila si Elmo nga iyang suod nga higala gipangutana siya, “Bay Loloy pila may imong sweldo nga hangtud karon nagbisikleta ka man lang gihapon. Wala ba diay ka katigom aron makapalit og motorsiklo?” Ug si Loloy mitubag, “Unsaon ko pagpalit og motorsiklo nga mao man lang gihapon ang akong sweldo- below the minimum.” Ug mitambag si Elmo sa pag-ingon, “Brad sultihi ang imong amo sa imong kahimtang basig nagtoo siya nga okay raka. Reklamo pud ug panagsa. Kay matud pas mga karaan, “Ang bata nga dili magdangoyngoy lagmit dili ka totoy.”

Mga igsoon, kon ang atong katungod yatakan, motingog gyud ta. Dili ta magpakahilom. Kon wala pa moabot ang gisaad mangutana gyud ta kon asa na. Mao ba gihapon ni o ilisan nalang? Unsa, kinsa, ngano? Kadugay ba! Way ba diay pahalipay ang tawong nagbudlay? Daghang gialsa way sulod ang bulsa. Saktong trabaho husto usab unta ang sweldo. Sigi’g overtime but less compensation. Bakho sa kabus angay’ng tubagon. Sa nagdangoyngoy og nangandoy; ang imong kalooy, ihatag na. Ayaw langay-langaya. Amen.