Miyawaki Pocket Forests pahingusgan sa Artsidyosesis

Hulyo 27, 2026 | Ang Cebu Archdiocesan Commission on Environmental Concerns (CACEC) ug mga kauban niini mipahigayon og usa ka Technical Training alang sa Laudate Deum Pocket Forest didto sa Saint John Hall, Brothers of Saint John, Banawa Hills, Cebu City.

Mitambong sa maong panagtigum sila si Cebu Archbishop Alberto S. Uy; Fr. Jonas Yap (Chairman sa CACEC); ug mga representante gikan sa lima ka pilot sites sa maong proyekto: Pope John XXIII Seminary; San Carlos Seminary College; Seminario Mayor de San Carlos; Spiritual Pastoral Formation Year; Virgen de los Remedios Parish sa Calamba, Labangon.

Ang Laudate Deum Pocket Forest usa ka pinanindot nga Miyawaki-inspired nga kalihokan sa parokya. Gilantaw nga usa ka inisyatibo sa kinatibuk-ang artsidyosesis, ang programa nagtinguha sa pag-establisar sa mga pocket forest (gagmayng lasang) ug ecological stewardship sites lukop sa 178 ka mga parokya sa Artsidyosesis sa Sugbu.

Samtang nagtugot sa pipila ka kausaban depende sa lugar, ang matag pocket forest magbaton sa kinauyokang prinsipyo sa pagpahiuli sa ecosystems pinaagi sa pagtanom sa mga nitibo ug lumad nga mga klase sa kahoy.

Labaw kaysa pagpalabong sa lasang, ang inisyatibo naglangkob sa edukasyon kabahin sa kalikopan, pagpahiuli sa klaseklaseng kinabuhi ug mananap, kasigurohan sa pagkaon, pagsugakod sa klima, partisipasyon sa parokya, espiritwal nga pormasyon, ug responsible nga pagkapiniyalan sa mugna.

Ang proyekto nagsalamin sa usa sa mga gitutukan sa Artsidyosesis sa panaw niini padulong sa iyang sentenaryo nga selebrasyon sa umaabot tuig 2034, nagpahimug-at nga ang pagkapiniyalan sa kalikopan lakip gayod sa uban pang mga pastoral nga gitutukan sa pagbuhat og mas malungtaron ug puno sa paglaum nga kaugmaon.

Dinasig sa Basic Ecclesial Communities (BECs), si Arsobispo Uy mitumbok kon giunsa nga ang natural nga kalibotan nagsalamin sa kinabuhi sa Simbahan.

Gipasabot niya nga kon ang mga kahoy gitanom duol sa usag-usa, ang ilang mga gamut magkabubod, nga makapahimo nila nga makasugakod og mga bagyo, nagdepensa sa usag-usa kanila, ug motubo sila nga mas paspas sa ilang pagpangita sa kahayag.

Sa susamang pagkaagi, miingon siya, ang mga Kristiyanos gitawag sa dungan nga paglakaw, nagsuporta sa usag-usa samtang nagpanaw padulong sa matuod nga kahayag – JesuCristo.

“Kon duol kaayo sila [ang mga kahoy] sa usa’g usa, they cover each other and they will grow faster kay mag-ilog sila sa adlaw. Kita pod, maglumba pod ta paingon sa langit. Pero dili ta mag-ilog nga mag-shinagitay; we support each other aron mas paspas ang atong pagsaka because of our situation. Our need for the light, the powerful light of Jesus,” paambit ni Arsobispo Uy.

Ang serye sa mga technical trainings, konsultasyon, ug preparasyon nagpadayon karon samtang ang Artsidyosesis nangandam alang sa paglusad sa maong proyekto atol sa Season of Creation karong umaabot Septiyembre 2026. | RCAC FB