Social Dimension of Sin and Forgiveness

Sulod mismo sa Simbahan, adunay mga panagbingkil ug panag-away. Tinuod pud kini diha sa mga relihiyosong grupo ug mga karismatikong kapunongan. Ang panag-away usahay atoang ipasangil sa yawa, apan kung buot hunahunaon bunga o epekto pud baya kini sa atoang tawhanong kahuyang.

Ang Ebanghelyo karong Domingo nga matawag natog ‘ecclesial discourse’ kay nag tawag kanato nga ipatigbabaw ang pagkamapasayloon. Dili gyud kini madali ilabi na niining atoang panahon karon nga kung asa nag ka grabe ang pagkamasinahon sa mga tawo. Makita nato ang pagkabahin-bahin sa atoang nasod tungod sa atoang mga politikanhong panlantaw. Kining maong kagubot misulod sa atoang Simbahan ug bisan man gani sa atong kabanayan.

Kining gitawag og “inclusivity” sa modernong katilingban kay dugay nang gitudlo ni Hesus. Apan, labaw pas “social inclusivity” nga usa ka ideolohiya, ang imbitasyon ni Kristo kay naghagit kanato nga mobiya sa atoang mga preferencia ug, labaw sa tanan, sa atoang pagka-pilian. Normal man siguro, ibutang ta, nga isip mga tawo, aduna kitay mga “gusto”, mga bias, ug mga paborito, apan ang Dios diha kang Kristo nagtawag kanato nga motabang ni bisan kinsa.

Kung i-apply kini nato sa atoang mga kontra, ang tumong kay mao ang “panaghiuli” o “reconciliation.” Walay mahitabo nga pastoral na pag-amoma kung walay pagpasaylo. Ang pagpasaylo sa mga nakasala kanato kay dili sayon apan kini maoy pinaka Kristohanong taras ug hiyas na nagpabiling hagit sa matag matuohon ni Hesus. Nahisubay kini sa giingon sa atoang Ginoo diha sa laing bahin sa Ebanghelyo, “kung ikaw tinuod gyud nga disipolo nako, kuhaa ug pas-ana imong krus ug sunod kanako.”

Kalbaryo gyud ang atoang padulngan kung kita mosunod ni Hesus, kay sa pagkatinuod, lami man gyud i-pangontra, lami man sad gyud awayon ang mga palaaway. Ilabi na niining atoang katilingban nga gi-dominar sa “social media”, lami dayon kaayong pikhan ang mga tawo nga nagpataka lag yawit diha sa Facebook. Laming insultohon ang mga wala migamit sa ilang “utok”.

Apan unsaon ta man, na matod pa ni Kristo, mga “brother” (o sister) man kita sa usag usa. Sa ato pa, diha sa atong bunyag, kita mga anak sa Dios, nga gibugkos sa usa ka “familial bond.” Mao man ganing kung adunay makasala kanato, angayang estoryahon nato ug deretso nga samag igsoon. Sa Iningles pa, “between you and him alone”. Dili ipa-agi ug mga estoryang witik-witik, libak-libak, mga komentaryong pinalabtik, o kanang gitawag sa mga beatang chismosa og “maritesing!” Guilty baya ta usahay o di ba kaha kanunay, kay imbis atoang tambagan ug tabangan nato ang atoang isig kaingon, tabangan man hinuon natog duot, ug padungog-dungogon diha sa social media. Usahay mas taas pa ang atoang libak kay sa atoang “novena.”

Ang gibadlong, o ang gi-estorya, o gitambahan, dili sad unta manobra ang ka “defensive.” Dili mag binatasan og “iro” nga mo dayog dagan og layo human ma bunalan sa lobot. Dawaton sa dakong pagpa-ubos, ug angkonon ang sayop nga nahimo aron makasibog na ang mga partido ngadto sa bag-ong hugna sa ilang relasyon o kinabuhi.

Husto ang gi-ingon sa Heswitang teologo na si Karl Rahner na ang sala dili “pribado.” Adunay “interconnectedness of sin.” Ang bisan unsang sala na mahimo ni bisan kinsa kay makasamad dili lamang sa makasasala ug sa mga direktang nahisad-an niya. Makasamad usab kini sa Simbahan kay ang Simbahan gilangkob man sa tanang binunyagan.

Mao man gani na gigamit sa Griyego ang pulong na ekerdēsas. Nga sa ato pa “ma kuha”’ o ma “ginansya” – sama sa kini na “kab-ot” sa positivong paagi. Nada-og. Kini nag pasabot na ang pagpasaylo kay usa ka hustisyang nakapauli sa unsay nadaot o naguba. Dili kini hustisya na bunga sa pagpanimalos. Walay hustisya diha sa pagpanimalos.