Ang Kahayag sa Panimalay – Gula 5

Mitiyabaw pag-ayo si Arlyn, tingale tungod sa kasakit sa iyang paa nga gihapak og makusog ni Aryana. Milakra ang mga pad ni Aryana sa paa ni Arlyn ug dalidali kini milabhag hinungdan sa nagbaga nga kasakit sa paa sa dalagita.

“Agaaay…Mama…kasakiiiit…”

“Sakit?! Kuwang pa na bayhana ka!” Ug gihan-an paghapak ug usab ni Aryana si Arlyn. Apan nakalikay ang dalagita samtang misuway ug sagang sa paghapak sa iyang inahan.

“Ayay…ayaw mama! Huuu…”

Si Andrew nga didto sulod sa kuwarto apan nakakita sa panghitabo tungod kay abiyerto ra man ang pultahan, nakugang sa panghitabo. Wala dayon siya makalihok. Unang higayon kini nga iyang nakita ang iyang inahan nga nasuko pag-ayo. Nagtoo siya. Apan niining mga higayona, mibalik sa iyang panumduman ang kasinatian kaniadto nga iya nang nakalimtan. Nakasulay naman diay sila ug kastigo sa iyang inahan.

Nahitabo kini sa mga gagmay pa kaayo sila nga mga bata ni Arlyn. Wala nila tuyoa samtang nagduwaduwa sila nga naigo sa ilang gipanglabay nga duwaan ang bag-o napalit nga telebisyon. Perteng dako sa liki sa TV resulta sa ilang kakiat nga nasuko pag-ayo ang ilang inahan ug nabunalan sila. Mao kadto ang unang higayon nga napasakitan sila sa ilang inahan ug nahinumduman kini ni Andrew sa iyang pagkadungog sa piti sa paghapak ni Aryana kang Arlyn.

Sa nakabalik na si Andrew sa iyang panimuot usa ka segundo ang milabay, dalidali siyang mibarog ug midagan padulong sa iyang inahan aron siya pugngan.

“Mama, ayaw na!” hangyo ni Andrew samtang nagpugong sa iyang inahan aron dili na matamparos pag-usab ang iyang manghud si Arlyn nga nagtikongkong sa may kilid sa sofa, naggunit sa usa ka unlan aron ikasampong sa dugang paghampak sa iyang inahan kaniya.

“Pahawa diha Andrew! Pahawa! Wa kay apil ani. Dugay na kong nagpailob nimo ha! Nganong kagahi man gyud nimo sugoon. Mao na kay magsige ka man lang og tutok anang imong selpon. Kana niya lat-an ko unya na og maoy akong ipakaon nimo aron di na ka mabuwag anang butanga!” Naghangos nga sulti ni Aryana.

“Mama, please…nahadlok na mi nimo. Mura na ka og dili among mama…” nagbakho nga sulti ni Andrew.

Nauknol si Aryana sa pagkadungog niya sa mga pulong ni Andrew. Nahilom siya sa makadiyot ug milingi kang Andrew, mitutok ug miingon, “Utro sad ka! Unsa imong giingon nako ganihang buntag? Gikapoy naka sa sige nakog yawyaw? Kahilas uroy nimo moingon nako ana!” [SUMPAYAN]