Worshippers not performers but witnesses

Samtang ang iyang kaabag sa parokya nagwali sulod sa simbahan sa adlaw’ng Domingo, ang kura paroko nakasakop ug mga akolito nga nagdula’g ML sa cellphone, nagpunsisok didto sa sakristiya. Busa gitudloan ug gimaymayan niya sila, “Ang misa usa ka balaan nga sakramento. Kay kamo altar servers, magsugod kini sa processional ug matapos usab sa recessional. Dili kini sama sa usa ka programa sa stage nga sa dili pa kita mokanta, mosayaw o mosulti pwede ra kita motago sa luyo sa stage ug maghulat kanus-a mo perform. You are worshippers not performers. Kamo magtutuo sa Dios ug nagsimba kaniya. Dili kamo magdudula sa drama.” Ug ang usa ka akolito mitubag, “Si Tonyo lagi padre ang atong organista, tua lagi to siya sa kusina sa konbento misaka. Mamahaw kuno to siya.” Ang pari nangalot nalang sa iyang ulo ug miingon, “Ako natong gimaymayan si Tonyo sa makadaghan apan gahi gyug ulo ang buang. Apan kamo simba gyud og buhata ang akong gisulti kaninyo!”

Mga igsoon, kon palapdan nato ang pagsabot sa atong pagka katoliko, dili lang pud kita kutob sa sulod sa simbahan magbinuotan ug unya magkiat-kiat bisan asa nalang. Sa Domingo mosimba ug mangalawat apan sa Lunes hangtud sa Sabado mag marites ug mangawat. Ayy pastilan! Dili paigo ang pagkamaayo nato sa mga kasaulogan. Nindot kaayo kita mo-blend sa atong mga tingog panahon sa misa. Apan dili kita mo-blend sa pagtagad sa dili nato higala. Hinaot nga ang atong tagsatagsa ka kinabuhi magsalamin sa kinabuhi ni Kristo nga atong gisimba. Amen.